الکفیل میوزیم کی جانب سے روضۂ امام نقی(ع) وامام عسکری(ع) کے عملے کے لیے نوادرات کی دیکھ بھال کے موضوع پر علمی نشست

روضہ مبارک حضرت عباس(ع) کے الکفیل عجائب گھر برائے نوادرات و مخطوطات نے اپنے علمی و فنی تعاون کے سلسلے کو آگے بڑھاتے ہوئے روضہ مبارک امام علی نقی(ع) و امام حسن عسکری(ع) کے عجائب گھر کے عملے کے لیے ایک اہم علمی نشست کا اہتمام کیا، جس کا موضوع تھا: "نوادرات کی دیکھ بھال اور مرمت کے اصول و طریقے"۔

الکفیل عجائب گھر میں لیبارٹری یونٹ کے سربراہ، سجاد حسن علی کے مطابق، اس نشست میں نوادرات اور تاریخی اشیاء، خواہ وہ نامیاتی ہوں یا غیر نامیاتی، کی دیکھ بھال، تحفظ اور مرمت کے جدید اصولوں کو بیان کیا گیا۔ اس عمل میں استعمال ہونے والے موزوں مواد کے بارے میں بھی گفتگو کی گئی۔

انہوں نے مزید بتایا کہ یہ نشست دراصل ایک تخصصی تربیتی کورس سے پہلے کا مرحلہ ہے، جس کا مقصد شرکاء کو نوادرات کی بحالی کے میدان میں مہارت فراہم کرنا ہے تاکہ وہ مستقبل میں خود ان قیمتی اشیاء کی دیکھ بھال کے قابل ہو سکیں اور ان کے طویل مدتی تحفظ کو یقینی بنایا جا سکے۔