السَّادَة الخدم ڈویژن کے خدماتی مواکب زائرین اربعین کو روزانہ72,000 کپ جوس فراہم کر رہے ہیں

روضہ مبارک حضرت عباس علیہ السلام کے السَّادَة الخدم ڈویژن کا کہنا ہے کہ ان کی خدماتی ٹیمیں زیارتِ اربعین کے موقع پر روزانہ تقریباً 72,000 کپ جوس زائرینِ امام حسین علیہ السلام میں تقسیم کر رہی ہیں۔

اس حوالے سے ڈویژن سے منسلک صحن یونٹ کے سربراہ جناب فیض الطعمہ نے کہا کہ ان کی یونٹ، صحن مبارک کے بیرونی حصوں میں زائرینِ اربعین کو خدمات فراہم کرنے کے عمل کو جاری رکھے ہوئے ہے، جہاں خدماتی مواکب شدید گرم موسم میں زائرین کی پیاس بجھانے پر خصوصی توجہ دے رہے ہیں۔

انہوں نے مزید بتایا کہ یہ مواکب روزانہ کی بنیاد پر انار اور زعفران کے مشروبات سمیت مختلف اقسام کے ٹھنڈے مشروبات تقسیم کرتے ہیں، تاکہ بابرکت زیارت کے دوران گرمی کی شدت کم کی جا سکے۔

شعبہ صحن شریف نہ صرف صحنِ مطہر کی صفائی کا ذمہ دار ہے، بلکہ وہاں بچھائے گئے 1,000 قالینوں کی ترتیب و صف بندی اور روضہ مبارک کے داخلی راستوں کی آرائش و نگہداشت کا فریضہ بھی انجام دیتا ہے۔ اس کے علاوہ روضہ مبارک حضرت ابا الفضل العباس علیہ السلام کو خوشبوؤں اور بخورات سے معطر کرنے کی ذمہ داری بھی اسی کے سپرد ہے۔

یہ تمام اقدامات روضہ مبارک حضرت عباس علیہ السلام کی جانب سے زائرینِ امام حسین اور ان کے بھائی حضرت ابا الفضل العباس (علیہم السلام) کو اعلیٰ، معیاری اور مؤثر خدمات فراہم کرنے کی مسلسل کوششوں کا مظہر ہیں۔