قرآن علمی کمپلیکس کی جانب سے حوزۂ نجف کے طلباء کے لیے دسواں قرآنی کورس

روضہ مبارک حضرت عباس(ع) کے قرآن علمی کمپلکس نے اپنے قرآنی منصوبے برائے سن 1447ھ کے تحت دینی علوم کے طلباء کے لیے دسویں قرآنی کورس کا اہتمام کیا۔


اس منصوبے کا اہتمام و انتظام کمپلکس کے ذیلی ادارے قرآن انسٹی ٹیوٹ نجف برانچ کی طرف سے کیا گیا ہے۔

انسٹی ٹیوٹ میں حوزوی امور کے سربراہ شیخ وسام سبتی نے کہا کہ آج ہم نے مدرسہ دارالحکمہ میں دسویں کورس کا آغاز کیا ہے، جس میں 17 طلباء نے شرکت کی، جس سے ان کورسز میں حصہ لینے والے کل طلباء کی تعداد 260 ہوگئی ہے۔

یہ قرآنی تربیتی منصوبہ تین تدریسی مراحل پر مشتمل ہے، جن میں احکامِ تلاوت اور علومِ قرآن کی تدریس شامل ہے۔ ابتدائی مرحلہ دو ماہ پر محیط ہوتا ہے، جس کے بعد دوسرا مرحلہ تین ماہ تک جاری رہتا ہے۔ ان دونوں مراحل کی تکمیل کے بعد طلبہ تجوید کے قواعد، قرآن فہمی کی بنیادی مہارتوں اور قرآنی علوم کے مبادی سے مکمل طور پر آراستہ ہو جاتے ہیں۔ اس کے بعد وہ تیسرے مرحلے میں داخلے کے اہل ہوتے ہیں، جو کہ قرآنِ کریم کے تخصصی علوم پر مشتمل ہے۔