روضہ مبارک حضرت عباس (ع) کی جانب سے مڈل اسکول کے طالب علموں کو سالانہ امتحانات کے دوران بلامعاوضہ ٹرانسپورٹ کی سہولت

روضہ مبارک حضرت عباس علیہ السلام اسلام کی جانب سے انسانی ہمدردی کی بنیاد پر تمام شعبہ ہائے زندگی میں امدادی اور فلاحی سرگرمیاں جاری ہیں اور بلا تفریق معاشرے کے کے تمام افراد ان سے استفادہ حاصل کر رہے ہیں۔ روضہ مبارک حضرت عباس علیہ السلام کے شعبہ ٹرانسپورٹ کی جانب سے مڈل اسکول کے طالب علموں کو سالانہ امتحانات کے دوران ان کے رہائشی علاقوں سے امتحانی مراکز تک بلامعاوضہ ٹرانسپورٹ کی سہولت فراہم کی جا رہی ہے۔

روضہ مبارک حضرت عباس علیہ السلام کے شعبہ ٹرانسپورٹ کے انچارج انجینئر عبد الجواد كاظم نے الکفیل نیٹ ورک سے بات کرتے ہوئے کہا کہ بہت سے طالب علم دور دراز علاقوں میں رہائش پذیر ہیں اور امتحانات کے دوران امتحانی مراکز تک جانا ان کے لئے ایک پریشان کن اور مشکل مرحلہ ہے۔ ان طالب علموں کی مشکلات کو دور کرنے اور ان کی تمام تر توجہ تعلیم پر مرکوز رکھنے کے لیے ہم نے 25 نشستوں پر مشتمل متعدد بسیں فراہم کی ہیں اور اسکولوں کی انتظامیہ اور والدین کے ساتھ مذاکرات کے بعد جامع منصوبہ بندی کے تحت طالب علموں کو امتحانات کے پہلے دن ہی سے ٹرانسپورٹ کی سہولت فراہم کی جارہی ہے جو امتحانات کے اختتام تک جاری رہے گی۔
انھوں نے وضاحت کرتے ہوئے کہا، "کورونا وائرس کی وجہ سے موجودہ طبی بحران کے پیش نظر ہر گاڑی میں طلباء کی ایک محدود تعداد کو بٹھایا جاتا ہے تاکہ سماجی دوری کے اصول پر عمل کیا جا سکے ، اس کے علاوہ طالب علموں کے لئے فیس ماسک کا استعمال لازمی ہے اور طالب علموں کے پک اینڈ ڈراپ سے پہلے اور بعد میں گاڑیوں میں جراثیم کش سپرے کیا جاتا ہے۔ "

روضہ مبارک حضرت عباس علیہ السلام کے اس اقدام پر سٹوڈنٹس اور والدین تہہ دل سے شکرگزار ہیں اور ان کا کہنا ہے کہ روضہ مبارک حضرت عباس علیہ السلام کے اس اقدام کی بدولت موجودہ طبی بحران اور شدید گرم موسم کے باوجود طالب علم حفاظت اور سہولت کے ساتھ پر سکون ماحول میں امتحانات دے رہے ہیں۔