ابا الفضل العباس سروس کمپلیکس میں زائرین اربعین کے لیے سہولیات میں مزید وسعت، نئی جگہ کی تیاری

روضہ مبارک حضرت عباس علیہ السلام کے زیر انتظام ابا الفضل العباس سروس کمپلیکس کے عملے نے زیارتِ اربعین کے دوران زائرین کی آمد و رفت کو مزید منظم اور آسان بنانے کے لیے کمپلیکس کے احاطے میں ایک اضافی جگہ تیار کرنے کا عمل شروع کر دیا ہے۔

کمپلیکس کے نگران، جناب جواد الحسناوی نے اس حوالے سے کہا:"یہ نئی جگہ خدماتی گاڑیوں کی پارکنگ کے لیے مخصوص کی جائے گی، جو پیدل چلنے والے زائرین کے راستوں سے علیحدہ ہوگی۔ اس اقدام کا مقصد زائرین کے لیے زیادہ منظم ماحول فراہم کرنا اور ان کی نقل و حرکت کو آسان بنانا ہے۔"

انہوں نے مزیدکہا کہ:"یہ اقدام ان متعدد تنظیمی و خدماتی اقدامات کا حصہ ہے جو گزشتہ کئی ہفتوں سے جاری ہیں، تاکہ مختلف صوبوں اور ممالک سے آنے والے زائرین کو بہترین ممکنہ سہولیات فراہم کی جا سکیں، اور کمپلیکس میں آمد و رفت کے دوران کسی بھی قسم کی بھیڑسے بچاجا سکے۔"

یہ بات قابل ذکر ہے کہ ابا الفضل العباس (علیہ السلام) سروس کمپلیکس روضہ مبارک حضرت عباس علیہ السلام سے وابستہ بڑے خدماتی مراکز میں سے ایک ہے، جو 40,000 مربع میٹر رقبے پر مشتمل ہے اور نجف و کربلا کے درمیانی راستے پر واقع ہے۔

یہ مرکز زائرین کو مختلف جامع سہولیات فراہم کرتا ہے جن میں آرام گاہیں، مہمان نوازی، طبی امداد، دینی رہنمائی اور دیگر انتظامی و خدماتی سہولیات شامل ہیں۔