الجوُد اِنٹراوینس سلوشنز فیکٹری کی نمایاں پیش رفت — قومی دواسازی صنعت میں کامیابی کی نئی مثال

روضہ مبارک حجرت عباس علیہ السلام سے منسلک الجود اِنٹراوینس سلوشنز فیکٹری نے اپنے قیام کے پہلے ہی سال میں نمایاں کامیابیاں حاصل کیں، جن کی بدولت فیکٹری نے عراقی منڈی میں قابلِ ذکر مقبولیت حاصل کی اور صحت کے اداروں کا اعتماد قومی دواسازی مصنوعات پر مزید مستحکم ہوا۔

فیکٹری کے ڈائریکٹر انجینئر حیدر شاكر القرعاوي نے کہا کہ فیکٹری کی سب سے بڑی کامیابی یہ رہی کہ اس کی تیار کردہ مصنوعات نے عراق کی سرکاری اور نجی دونوں منڈیوں میں کامیابی کے ساتھ اپنی جگہ بنائی۔ انہوں نے بتایا کہ فیکٹری نے دوا ساز کمپنی (کیمادیا) کے ذریعے عراق کے سرکاری اسپتالوں کو وریدی محلول فراہم کیے، جہاں قیمت اور معیار کے لحاظ سے کامیاب مسابقت کے نتیجے میں تین سرکاری معاہدوں پر دستخط کیے گئے تاکہ مختلف طبی اداروں کو یہ محلول فراہم کیے جا سکیں۔"

انہوں نے مزید بتایا کہ فیکٹری نے نجی شعبے میں بھی اپنی سرگرمیوں کا دائرہ وسیع کیا ہے، اور اب وہ ملک کے مختلف گورنریٹس میں موجود نمائندوں، گوداموں اور دفاتر کے منظم نیٹ ورک کے ذریعے فعال انداز میں کام کر رہی ہے، جس سے مقامی منڈی میں فیکٹری کی موجودگی مزید مستحکم ہوئی اور اس کی مصنوعات کی طلب میں نمایاں اضافہ دیکھا گیا۔

انہوں نے کہا کہ "اس سال فیکٹری نے انفراسٹرکچر اور انتظامی نظام میں نمایاں پیش رفت کی ہے، اس ضمن میں چار ملین سے زائد بوتلوں کی گنجائش رکھنے والا جدید مرکزی گودام قائم کیا گیا، نئی ترسیلی گاڑیاں فراہم کی گئیں، جبکہ انتظامی و مالیاتی نظام کو ڈیجیٹلائز کر کے کارکردگی میں بہتری اور اخراجات میں کمی کو یقینی بنایا گیا۔"

انہوں نے مزید کہا کہ یہ تمام کامیابیاں فیکٹری میں کام کرنے والے عراقی ماہر عملے کی انتھک محنت اور روضہ مبارک حضرت عباس علیہ السلام کی براہِ راست سرپرستی کا نتیجہ ہیں، جس نے قومی دواسازی صنعت کی ترقی کے لیے ایک مثالی اور پیشہ ورانہ ماحول فراہم کیا۔

اختتام پر انہوں نے اس عزم کا اظہار کیا کہ فیکٹری صحتِ عامہ کے فروغ کے لیے پیداوار میں توسیع اور معیارِ پیداوار میں مزید بہتری کے منصوبوں پر مسلسل عمل پیرا ہے۔