دوسرے سالانہ ’تعزيز الذاكرہ‘ فیسٹیول کے دوران الوافی فاؤنڈیشن کی جانب سے عراق کی عصری تاریخ پر مبنی انسائیکلوپیڈیا کی نمائش۔

روضہ مبارک حضرت عباس (علیہ السلام) کی الوافی فاؤنڈیشن فار ڈاکومینٹیشن اینڈ اسٹڈیز نے کوفہ یونیورسٹی میں منعقدہ دوسرے سالانہ ’تعزيز الذاكرہ‘ فیسٹیول کے دوران ’فتویٰ دفاعِ کفائی‘ انسائیکلوپیڈیا نمائش کے لئے پیش کیا ہے۔

یہ پانچ روزہ فیسٹیولروضہ مبارک حضرت عباس (علیہ السلام) کے زیر اہتمام کوفہ یونیورسٹی کے کالج آف سائنس کی جانب سے منعقد کیا گیا ہے۔ اس فیسٹیول میں متعدد علمی، ثقافتی اور تعلیمی ادارے شرکت کر رہے ہیں۔

الوافی فاؤنڈیشن میں اسٹڈیز یونٹ کے سربراہ سید محمد الباوی نے اس موقع پر گفتگو کرتے ہوئے کہا کہ اس فیسٹیول میں ہماری شرکت کا بنیادی مقصد قومی یادداشت کا تحفظ اور عراق کی جدید تاریخ کے اہم اور فیصلہ کن واقعات کو دستاویز کرنا ہے۔

انہوں نے مزید کہا کہ "فتویٰ دفاعِ کفائی" انسائیکلوپیڈیا محض ایک کتاب نہیں بلکہ ایک اہم دستاویزی منصوبہ ہے، جس کا مقصد ایک حساس تاریخی مرحلے کی تفصیلات کو جمع کرنا، ان کا تجزیہ کرنا اور انہیں علمی بنیادوں پر مدون کرنا ہے، تاکہ ان حقائق کو مستند انداز میں آنے والی نسلوں تک منتقل کیا جا سکے۔

انہوں نے اس بات پر بھی زور دیا کہ فیسٹیول میں اس انسائیکلوپیڈیا کی نمائش کا مقصد طلبہ اور محققین میں شعور بیدار کرنا اور ان اعلیٰ اقدار اور قربانیوں کو زندہ جاوید بنانا ہے جو عراقی عوام نے اپنے وطن اور مقدسات کے دفاع میں پیش کی تھیں۔

الوافی فاؤنڈیشن فار ڈاکومینٹیشن اینڈ اسٹڈیز، اپنی متنوع سرگرمیوں کے ذریعے معاشرے میں دستاویزی ثقافت کو فروغ دینے اور قومی تاریخ و یادداشت کے تحفظ کی اہمیت کو اجاگر کرنے کے لیے مسلسل کوشاں ہے۔