قرآن علمی کمپلیکس کی جانب سے کربلا میں "حفظِ قرآن پروجیکٹ" کے طلباء کے لیے ایک تربیتی لیکچر کا انعقاد

روضہ مبارک حضرت عباس (علیہ السلام)کے قرآن علمی کمپلیکس کی جانب سے کربلائے معلیٰ میں "حفظِ قرآن پروجیکٹ" کے طلباء کے لیے ایک تربیتی لیکچر کا انعقاد کیا گیا۔

قرآن علمی کمپلیکس سے منسلک قرآن انسٹی ٹیوٹ کربلا کے ڈائریکٹر شیخ جواد النصراوی نے بتایا کہ انسٹی ٹیوٹ نے حفظِ قرآن منصوبے کے طلباء کے لیے ایک تعلیمی لیکچر کا اہتمام کیا،جو ان فکری، تربیتی اور مذہبی لیکچرز کے سلسلے کا حصہ ہے جو انسٹی ٹیوٹ اپنے حفاظ طلباء کے لیے باقاعدگی سے منعقد کرتا رہتا ہے۔

انہوں نے مزید کہا کہ "یہ لیکچر حفظ یونٹ کے سربراہ شیخ علی الروائی نے انسٹی ٹیوٹ کے ہیڈکوارٹر میں دیا۔ اپنے لیکچر میں انہوں نے امام جعفر صادق (علیہ السلام) کے عظیم علمی و سیاسی کردار، آپؑ کی سیرتِ مبارکہ اور جعفریہ مکتبہ فکر کے قیام کے مختلف مراحل پر تفصیلی روشنی ڈالی۔

شیخ نصراوی نے واضح کیا کہ ان لیکچرز کے انعقاد کا مقصد حفظِ قرآن کے روزانہ کے دروس کے ساتھ ساتھ، اپنے حفاظ بچوں کے ذہنوں میں قرآنی اور مذہبی ثقافت کو راسخ کرنا ہے۔