شعبہ مضیف کی جانب سے شبِ جمعہ کے موقع پر زائرین میں 10 ہزار کھانے کے پیکٹس تقسیم کیے گئے۔

روضہ مبارک حضرت عباس (علیہ السلام) کے شعبہ مضیف کی جانب سے شبِ جمعہ کے بابرکت موقع پر سید الشہداء حضرت امام حسین(علیہ السلام) اور علمدارِ کربلا حضرت ابوالفضل العباس(علیہ السلام) کے زائرینِ کرام میں 10 ہزار سے زائد کھانے کے پیکٹس تقسیم کیے گئے۔

شعبے کے نائب سربراہ سید حسن ہاشم نے بتایا کہ شعبے نے شبِ جمعہ کی مناسبت سے کربلائے معلیٰ آنے والے زائرینِ کرام کی میزبانی کا شرف حاصل کرتے ہوئے انہیں 10 ہزار کھانےکے پیکٹس فراہم کیے ہیں۔

انہوں نے مزید کہا کہ یہ خدمات شعبے کے اس منصوبے کا حصہ ہیں جس کا مقصد اس بابرکت رات میں امام حسین علیہ السلام اور ان کے بھائی حضرت ابو الفضل العباس علیہ السلام کی زیارت کے لیے آنے والے زائرین کی ضروریات کو پورا کرنا ہے۔

ہاشم نے وضاحت کی کہ شعبہ مضیف کا عملہ حفظانِ صحت کے عالمی اور منظور شدہ معیارات پر عمل پیرا ہے۔ کھانا تیار کرنے، پیک کرنے اور اسے زائرین تک پہنچانے کے لیے ایک انتہائی مربوط اور منظم طریقہ کار وضع کیا گیا ہے تاکہ تقسیم کے عمل کو سہل اور بلا تعطل بنایا جا سکے اور زائرین کو کسی قسم کی زحمت کا سامنا نہ کرنا پڑے۔

انہوں نے کہا کہ یہ کاوشیں روضہ مبارک حضرت عباس (علیہ السلام) کے ان اقدامات کا حصہ ہیں جن کا مقصد زائرین کو فراہم کی جانے والی خدمات کے معیار کو بہتر بنانا اور مخصوص ایامِ زیارت میں ان کے لیے ہر ممکنہ سہولیات فراہم کرنا ہے۔