روضہ مبارک حضرت عباس (علیہ السلام) کے وفد نے دوسرے امدادی قافلے میں شامل غذائی اشیاء ایرانی ہلالِ احمر کے حوالے کر دی ہیں۔

روضہ مبارک حضرت عباس (علیہ السلام) کے وفد نے قم مقدسہ میں موجود اعلیٰ دینی قیادت کے دفتر کے تعاون سے، دوسرے امدادی قافلے میں شامل غذائی اشیاء ایرانی ہلالِ احمر (ریڈ کریسنٹ) کے حوالے کر دی ہیں۔

اس دوسرے امدادی قافلے میں 10 بڑے ٹرک شامل ہیں، جن پر درج ذیل سامان لدا ہوا ہے: 137 ٹن غذائی مواد، 18 ٹن طبی سامان اور ادویات، 20 عدد ڈائلیسز مشینیں، 1 عدد بلڈوزر و کرین

روضہ مبارک کے وفد کے رکن شیخ حیدر العارضی نے اس حوالے سے گفتگو کرتے ہوئے کہا کہ عراقی عوام کی طرف سے مسلسل ملنے والی حمایت اور عطیات کی بدولت، روضہ مبارک حضرت عباس (ع) ایرانی عوام کے لیے اپنی امدادی مہم کو جاری رکھے ہوئے ہے۔ یہ مہم نجف اشرف اور قم مقدسہ میں موجود اعلیٰ دینی قیادت کے دفاتر کے مابین باہمی ہم آہنگی اور سید جواد شہرستانی کی سرپرستی میں چلائی جا رہی ہے۔

انہوں نے مزید بتایا کہ روضہ مبارک کے وفد نے دوسرے امدادی قافلے کے تحت تمام غذائی اشیاء اور دیگر ضروری سامان باضابطہ طور پر ایرانی ہلالِ احمر کے حوالے کر دیا ہے۔

یاد رہے کہ روضہ مبارک حضرت عباس (علیہ السلام) نے اعلیٰ دینی قیادت کی جانب سے متاثرین کی مدد کی اپیل پر لبیک کہتے ہوئے، ایرانی اور لبنانی عوام کی مدد کے لیے اس انسانی مہم کا آغاز کیا تھا اور اس مقصد کے لیے عطیات جمع کرنے کے دروازے کھولے تھے۔

اس سے قبل، روضہ مبارک نے اپنا پہلا امدادی قافلہ بھی روانہ کیا تھا جو 38 ٹرکوں پر مشتمل تھا اور اس میں 690 ٹن امدادی سامان بھیجا گیا تھا جس میں 670 ٹن بنیادی غذائی اجناس اور 20 ٹن ضروری طبی سامان شامل تھا۔