مرکزِ صدیقہ طاہرہ (سلام اللہ علیہا) مقامات مقدسہ کربلا آنے والی خواتین زائرین کو صحت اورعلاج کی بلامعاوضہ خدمات فراہم کر رہا ہے

روضہ مبارک حضرت عباس علیہ السلام کا میڈیکل افیئرز ڈیپارٹمنٹ، الصدیقہ الطاہرہ (علیہا السلام) لیڈیز میڈیکل سینٹر کے تعاون سے کربلائے معلیٰ آنے والی خواتین زائرین کو صحت اور علاج معالجے کی مفت خدمات فراہم کرنے کا سلسلہ جاری رکھے ہوئے ہے۔

شعبہ کی سربراہ ڈاکٹر حیفہ التمیمی نے مرکز کی کارکردگی اور اہداف پر روشنی ڈالتے ہوئے بتایا کہ یہ مرکز ایک جامع اور مربوط پلان کے تحت خواتین زائرین کو صحت اور انتظامی خدمات فراہم کر رہا ہے، جس کا بنیادی مقصد انہیں علاج و معالجے کا بہترین، محفوظ اور آرام دہ ماحول فراہم کرنا ہے۔

انہوں نے مزید کہا کہ مرکز میں خدمات کی فراہمی کے لیے تمام تر طبی و نرسنگ عملہ خواتین پر مشتمل ہے، جن کے ساتھ عراق کے مختلف صوبوں سے تعلق رکھنے والی رضا کار خواتین بھی شامل ہیں۔ یہ تمام رضاکار چوبیس گھنٹے طبی نگہداشت، زائرین کی رہنمائی، نظم و ضبط برقرار رکھنے اور مریضوں کی دیکھ بھال میں مرکز کے مستقل عملے کے ساتھ بھرپور تعاون پیش کر رہی ہیں۔

ڈاکٹر التمیمی نے واضح کیا کہ ہمارا بنیادی ہدف خواتین زائرین کے لیے ایک محفوظ اور مثالی معالجاتی ماحول کی فراہمی ہے۔ اس مقصد کے لیے تمام طبی، انتظامی اور خدماتی شعبوں میں مربوط ہم آہنگی قائم کی گئی ہے، تاکہ کربلائے معلیٰ میں بڑی دینی مناسبات کے دوران لاکھوں زائرین کی طبی ضروریات کو انتہائی پیشہ ورانہ اور احسن طریقے سے پورا کیا جا سکے۔