العمید یونیورسٹی کی جانب سے غریب اور ضرورت مند خاندانوں کے لئے’’ رمضان فوڈ باسکٹ مہم‘ کا آغاز

رمضان المبارک کے بابرکت مہینے کے دوران العمید یونیورسٹی کے پروفیسرز ، ملازمین اور طلباء کی جانب سے گزشتہ سالوں کی روایت کو برقرار رکھتے ہوئے ضرورت مند افراد کی مدد کے لیے ’’سالانہ فوڈ باسکٹ مہم ‘‘ کا آغاز کیا جاچکا ہے۔

اس مہم کے دوران العمید یونیورسٹی کے طلباء کے ایک گروپ نے اپنے اساتذہ کے ہمراہ شہر کے غریب خاندانوں، شہداء کے خاندانوں اور ایتام سے ملاقاتیں کیں اور انہیں اخلاقی اور مالی مدد فراہم کی۔

العمید یونیورسٹی کے نائب صدر برائے انتظامی امور ڈاکٹر علاء الموسوی نے الکفیل نیٹ ورک سے بات کرتے ہوئے کہا: اس مہم کی نگرانی محکمہ نفسیاتی مشاورت اور تعلیمی رہنمائی کرتا ہے۔ اس مہم کے دوران ضرورت مند افراد اور خاندانوں کو غذائی اشیاء فراہم کی جارہی ہیں تاکہ رمضان المبارک کے مہینے میں ان خاندانوں سے اظہار یکجہتی کرتے ہوئے ان کی غذائی ضروریات کو پورا کرنے میں مدد دی جا سکے۔

انہوں نے کہا کہ یہ دورے ناصرف طالبعلموں میں سماجی اور اخلاقی تعلقات کو فروغ دینے میں اہم کردار ادا کریں گے بلکہ طالبعلموں کو معاشرے میں موجود ایسے افراد کے لئے ان کی ذمہ داریوں کے بارے میں شعور بھی اجاگر کریں گے۔