نجف کربلا روڈ / 1102 نمبر کھمبا: ہاشمی مہمان نوازی کا ایک مقام

نجف کربلا روڈ پر روضہ مبارک حضرت عباس(ع) کا بیرونی مضیف ان مقامات میں سے ایک ہے کہ جہاں کربلا کی طرف پیدل آنے والے زائرین کو حضرت عباس(ع) کے دسترخوان سے کھانا کھلایا جاتا ہے اور انھیں ہر طرح کی خدمات فراہم کی جاتی ہیں۔

روضہ مبارک حضرت عباس(ع) کے مجلس ادارہ کے رکن اور اس بیرونی مضیف کے انچارج الحاج جواد حسناوی نے الکفیل نیٹ ورک سے گفتگو کے دوران کہا ہے کہ یہ مضیف 2008ء میں کھولا گیا کیونکہ اربعین امام حسین(ع) کے موقع پر عراق کے مختلف شہروں سے پیدل کربلا آنے والے زائرین کی اکثریت شاہراہِ یا حسین{ع} (نجف کربلا روڈ) سے ہوتی ہوئی کربلا پہنچتی ہے اور بہت سے لوگ تو پیدل سفر کی ابتدا ہی نجف سے کرتے ہیں جس کی وجہ سے پیدل کربلا آنے والے زائرین کا سب سے زیادہ رش نجف کربلا روڈ پہ ہوتا ہے۔

اسی بات کو مدنظر رکھتے ہوئے روضہ مبارک حضرت عباس(ع) نے کھمبا نمبر (1102) کے پاس نجف کربلا روڈ پر واقع اپنے مہمان خانہ (مضيفُ العتبة العبّاسية) میں زائرین کی خدمت کے لیے بڑے پیمانے پر انتظامات کیے ہیں۔

اس وقت نجف اور کربلا کے درمیان واقع روضہ مبارک حضرت عباس(ع) کا مضیف پیدل آنے والے زائرین کی خدمت میں دن رات سرگرم عمل ہے ہر روز یہاں لاکھوں زائرین کے لیے کھانے پینے، آرام و قیام اور یہاں موجود دیگر خدمات کا انظام کیا جا رہا ہے۔

اس کے علاوہ یہاں میڈیکل ڈسپنسری، گمشدہ افراد کا مرکز اور شرعی سوالات کے جوابات کے لیے بھی مرکز موجود ہے جہاں زائرین کو مطلوبہ خدمات فراہم کی جا رہی ہیں اور یہ خدمات زیارت اربعین کے بعد بھی جاری رہیں گی خاص طور پر اٹھائیس صفر کو رسول خدا(ص) کی وفات کا پرسہ پیش کرنے بھی ایک بڑی تعداد اسی راستہ سے نجف پیدل جاتی ہے جن کو سروس مہیا کرنا روضہ مبارک کا اولین فرض ہے۔