امام علی نقی(ع) کی شہادت کا پرسہ پیش کرنے کیلئے روضہ مبارک امام حسین(ع) اور حضرت عباس(ع) میں ماتمی جلوسوں کی آمد.....

تین رجب وہ المناک دن ہے جس میں حضرت امام علی نقی علیہ السلام نے زہر عدو کے نتیجہ میں جام شہادت نوش کیا۔ ہر سال کی طرح امسال بھی 3 رجب 1443 ہجری بمطابق 5 فروری 2022 کو امام علی نقی علیہ السلام کے یوم شہادت کے احیاء کے لئے صبح سویرے ماتمی جلوسوں اور عزاداروں کی روضہ مبارک حضرت عباس علیہ السلام اور روضہ مبارک امام حسین علیہ السلام میں آمد شروع ہو گئی تھی جس کا سلسلہ جاری رہا اور عزادار امام حسین علیہ السلام اور حضرت عباس علیہ السلام کو دسویں امام کی شہادت کا پرسہ پیش کر رہے ہیں۔
اس المناک شہادت کا پرسہ پیش کرنے کے لیے آنے والے جلوس عزاء شارع قبلہ سے روضہ مبارک حضرت عباس(ع) میں داخل ہوتے ہیں اور وہاں عزاداری اورپرسہ پیش کرنے کے بعد مابین الحرمین سے ہوتے ہوئے حضرت امام حسین علیہ السلام کو امام علی نقی علیہ السلام کی شہادت کا پرسہ پیش کرنے کے لیے روضہ مبارک امام حسین(ع) میں داخل ہو جاتے ہیں اور وہاں ماتم داری کے بعد اکثر جلوس وہیں اختتام پذیر ہو جاتے ہیں۔
دوسری طرف ، روضہ مبارک حضرت عباس علیہ السلام کی جانب عزائی جلوسوں کا استقبال کرنے اور بھیڑ سے بچنے کے لئے خصوصی انتظامات اور تیاریاں کی گئیں ہیں۔
واضح رہے کہ حضرت امام علی نقی علیہ السلام کے یوم شہادت کے حوالے سے روضہ مبارک حضرت عباس علیہ السلام کے صحن میں ماتم داری اور مجالس عزاء کا سلسلہ جاری ہے کہ جس میں ہزاروں افراد شرکت کر رہے ہیں۔

واضح رہے کہ امام على نقى علیہ السلام رسول خدا(ص) کے دسویں جانشین ہیں، امام على نقى علیہ السلام مدينہ کے اطراف میں مقام صریا میں سن 212 ہجری اور دوسری روايت کے مطابق214 ہجری کو اس دنیا میں تشریف لائے یہ وہ مقام ہے جس کو امام موسیٰ کاظم ابن امام جعفر صادق علیھما السلام نے بسایا تھا جو مدینہ سے تین میل دور ہے۔ انہوں نے اپنے والدِ گرامی سے میراث امامت کو حاصل کیا۔ وقت کے حاکم معتمد عباسی نے امام علی نقی علیہ السلام کو زہر کے ذریعے سن 254 ہجری میں شہید کیا۔