حضرت فاطمہ(ع) کی شہادت کی یاد میں روضہ مبارک حضرت عباس(ع) کے ہر گوشہ میں سوگ کے آثار

جگر گوشہ رسول حضرت فاطمہ زہراء سلام اللہ علیھا کی مظلومانہ شھادت کی یاد میں روضہ مبارک حضرت عباس علیہ السلام سوگ کی سیاہ چادروں سے ڈھکا ہوا ہے۔ ہرجانب غم و حزن کے آثار دکھائی دے رہے ہیں ہر طرف عزائی بینرز اور سیاہ چادریں لٹکی ہوئی ہیں ہر چہرہ غمگین نظر آ رہا ہے جگہ جگہ اس المناک سانحہ پہ اہل بیت علیھم السلام اور خاص طور پر امام حسین علیہ السلام اور حضرت عباس علیہ السلام کو پرسہ پیش کرنے کے لیے بینرز لگے ہوئے ہیں۔


روضہ مبارک حضرت عباس علیہ السلام میں صحن شریف ڈیپارٹمنٹ کے معاون سربراہ شیخ زین العابدین نے بتایا ہے کہ شعبہ کے عملہ نے ایام فاطمیہ کے احیاء کے لئے سیاہ علم، سیاہ چادریں، عزائی بینرز وغیرہ پورے روضہ مبارک میں آویزاں کیے ہیں کہ جن پر حضرت زہراء سلام اللہ علیہا سے متعلق احادیث اور کلمات تحریر ہیں۔

انھوں نے مزید بتایا کہ حضرت فاطمہ سلام اللہ علیہا کی یوم شہادت کے بارے میں مشہور تینوں روایات میں مذکور ایام میں ہمارا ڈیپارٹمنٹ ایام فاطمیہ منائے گا۔

واضح رہے کہ اس المناک سانحہ کے احیاء کے لیے روضہ مبارک حضرت عباس(ع) میں مجالس اور ماتم داری کا انعقاد جاری ہے۔