مرکزُ الصادقَینؑ کی جانب سے صدور المرويات کی تحقیق کے بارے میں تخصصی کورس کا اہتمام

روضہ مبارک حضرت عباس(ع) کی ہیئتِ عالیہ برائے احیاءِ تراث سے وابستہ مرکزُ الصادقَینؑ برائے تحقیقات، مطالعات اور تحقیقِ مخطوطات نے صدور المرويات کی تحقیق سے متعلق بنیادی مہارت کے حوالے سے ایک خصوصی کورس کا انعقاد کیا ہے۔

کورس میں لیکچرز کے لیے مدعو کیے گئے استاد سید غیث شبر نے بتایا کہ اس تربیتی کورس میں متعدد لیکچرز شامل ہیں، جن میں روایات کے صدور کی تحقیق کے لیے درکار مہارت کے حصول کے طریقۂ کار کو مختلف پہلوؤں سے بیان کیا جا رہا ہے۔ اس میں علمِ رجال اور علمِ درایت کی نظری مباحث کی بجائے زیادہ زور عملی اور تطبیقی طریقۂ کار پر دیا گیا ہے، بالخصوص اس کام کے رجالی اطلاق اور صدور کی پہچان کی مہارت پیدا کرنے پر توجہ مرکوز کی گئی ہے۔

مرکز کے رکن شیخ حمد الشمری نے اس حوالے سے بتایا کہ یہ کورس تین ہفتوں پر محیط ہے اور اس میں علمِ رجال سے متعلق نظری و عملی دونوں پہلوؤں کو یکجا کیا گیا ہے، تاکہ دینی علوم کے طلباء اور علمی و جامعاتی حلقوں سے وابستہ افراد کی صلاحیتوں کو مزید بہتر بنایا جا سکے۔

انہوں نے مزید کہا کہ مرکز اس سے قبل بھی تحقیق اور علمی مقالہ نویسی کے حوالے سے معیاری اور نوعیتی کورسز منعقد کر چکا ہے، جن کے نتیجے میں اصولِ استخراجِ مبانی اور تحقیقاتی تحریر کے فن پر مشتمل مؤلفہ علمی کام سامنے آئے۔

انہوں نے یہ بھی بتایا کہ موجودہ کورس کی تکمیل کے فوراً بعد اسے مرکز کے رسمی پلیٹ فارمز پر اپ لوڈ کر دیا جائے گا، تاکہ اس سے محققین اور اہلِ تحقیق زیادہ سے زیادہ استفادہ کر سکیں۔