الکفیل ہنی فارمز کی سلیمانیہ بین الاقوامی زرعی و غذائی نمائش میں شاندار شرکت

روضۂ مبارک حضرت عباسؑ کے الکفیل ہنی فارمز نے 17 تا 20 دسمبر 2025ء سلیمانیہ میں منعقد ہونے والی بین الاقوامی زرعی و غذائی صنعتوں کی نمائش میں بھرپور اور کامیاب شرکت کی۔ اس نمائش میں مقامی اور بین الاقوامی کمپنیوں کی بڑی تعداد بھی شریک تھی۔

نمائش کے دوران الکفیل ہنی فارمز کے پویلین نےوزیٹرز، ماہرین اور متعلقہ شعبہ جات کے نمائندگان کی خصوصی توجہ حاصل کی۔ یہاں اعلیٰ معیار کے قدرتی شہد کی مختلف اقسام اور مکھیوں کے چھتّوں سے تیار کردہ متنوع مصنوعات کو نہایت سراہا گیا۔ اس موقع پر وزیٹرز کو ان مصنوعات کی غذائی افادیت اور طبی فوائد سے بھی آگاہ کیا گیا۔

الکفیل ہنی فارمز کی اس شرکت کو وزارتِ زراعت کے حکام کی جانب سے بھی باضابطہ سراہا گیا، جبکہ اعلیٰ معیار اور منفرد خصوصیات کی حامل مصنوعات کے باعث گروپ کو بھرپور میڈیا کوریج اور وسیع توجہ بھی حاصل رہی۔

نمائش کے دوران جدید اور معاصر علاجی طریقۂ کار پر بھی روشنی ڈالی گئی، جن میں مکھی کے زہر کے ذریعے علاج (Bee Venom Therapy) اور مکھیوں کے چھتّے کی فضا میں سانس لینے کی تکنیک شامل تھی۔ یہ طریقے مکھیوں کی مصنوعات پر مبنی تکمیلی طب کے میدان میں جدید اور ترقی یافتہ تجربات شمار کیے جاتے ہیں۔

نمائش کے اختتام پر سلیمانیہ بین الاقوامی نمائش کی انتظامیہ کی جانب سے الکفیل ہنی فارمز کو نمائش کی کامیابی میں فعال شرکت، مؤثر کردار اور نمایاں خدمات کے اعتراف کے طور پر شرکت اور امتیازی کارکردگی کا سرٹیفکیٹ پیش کیا گیا۔