شعبۂ دینی رہنمائی برائے خواتین کے زیرِ اہتمام امام موسیٰ کاظم(ع) کا یومِ شہادت عقیدت و احترام سے منایا گیا

روضہ مبارک حضرت عباس (علیہ السلام) کے دفتر متولی شرعی برائے امور نسواں سے وابستہ "شعبۂ دینی رہنمائی برائے خواتین" (شعبة التوجيه الديني النسوي) نے امام موسیٰ کاظم (علیہ السلام) کے یومِ شہادت کی مناسبت سے ایک جامع عزائی پروگرام کا انعقاد کیا، جس میں زائرات کی بڑی تعداد نے شرکت کی۔

یہ عزائی تقریب روضہ مبارک حضرت عباس (علیہ السلام) کے اندر واقع "سرداب امام موسیٰ کاظم (علیہ السلام)" میں منعقد ہوئی، جہاں پُرسہ پیش کرنے والی زائرات کا جم غفیر موجود تھا۔

شعبہ کی سربراہ سیدہ عذراء شامی نے بتایا کہ: یہ پروگرام روضہ مبارک میں موجود خواتین کے دیگر شعبہ جات کے تعاون سے ایک ایسے روحانی ماحول میں منعقد کیا گیا جو غم، وفاداری اور اس عظیم مصیبت پر مولا ابوالفضل العباس (علیہ السلام) کو پُرسہ پیش کرنے کے جذبات سے لبریز تھا۔

انہوں نے مزید تفصیلات بتاتے ہوئے کہا کہ اس عزائی پروگرام میں درج ذیل فقرات شامل تھے:

تقریب کا آغاز کلامِ الہیٰ کی تلاوت سے ہوا۔

"نُورٌ يُحَطِّمُ القُيُودَ" کے عنوان سے ایک خاکہ پیش کیا گیا، جس میں امام موسیٰ کاظم (علیہ السلام) کی سیرت کے اہم پہلوؤں کو اجاگر کیا گیا۔

پروگرام میں رقت آمیز قصائد اور نوحے پڑھے گئے جن سے فضا سوگوار ہوگئی۔

مجلس کا اختتام امامِ زمانہ (عج) کے ظہور کے لیے "دعائے فرج" کی تلاوت کے ساتھ ہوا۔