'قومی یومِ قرآن' کی مناسبت سے روضہ مبارک حضرت عباس(ع) میں مرکزی محفلِ قرآن کا انعقاد

روضہ مبارک حضرت عباس (علیہ السلام) کے جنرل سیکرٹریٹ (الامانة العامة) کی جانب سے "قومی یومِ قرآن کریم" کے موقع پر ایک پروقار مرکزی محفلِ قرآن کا انعقاد کیا گیا، جس میں بین الاقوامی شہرت یافتہ قراء کرام اور زائرین کی بڑی تعداد نے شرکت کی۔

یہ نورانی محفل مولا ابوالفضل العباس (علیہ السلام) کے صحنِ اطہر میں سجائی گئی، جہاں "موسسہ المصطفیٰ (ص) برائے رہنمائی و مذہبی بیداری" کے مرکزِ قرآن کریم کے وفد اور زائرین کے جم غفیر نے شرکت کر کے محفل کی رونق کو دوبالا کیا۔

روضہ مبارک کی مرکزی تقریبات کمیٹی کے رکن ڈاکٹر مشتاق العلی نے اس حوالے سے بتایا کہ: یہ محفل 'بعثتِ نبوی (ص)' اور 'عراقی قومی یومِ قرآن' کے حسین امتزاج کے طور پر منعقد کی گئی ہے۔ اس کا مقصد قرآن پاک کی خوشبو کو عام کرنا، قرآنی ثقافت کی ترویج اور روضات مقدسہ کے نامور قراء کی آواز میں کلامِ الہیٰ کی تلاوت کے ذریعے اس دن کی عظمت کو اجاگر کرنا ہے۔

اس روحانی محفل میں عالمِ اسلام کے نامور قراء نے اپنی سحر انگیز آوازوں میں تلاوت کا شرف حاصل کیا، جن میں درج ذیل شخصیات نمایاں تھیں:

جناب کریم منصوری (قاری روضہ مبارک امام علی علیہ السلام)

جناب اسامہ کربلائی (قاری روضاتِ کربلا)

جناب محمد رضا زبیدی (قاری روضاتِ کربلا)

محفل کے اختتام پر شرکاء نے اس قرآنی ماحول اور روضہ مبارک کے انتظامات کو بے حد سراہا۔