العمید ایوارڈ برائے تلاوتِ قرآن کے 23ویں راؤنڈ میں عراق کے قاری عمار سالم فائنل مرحلے میں پہنچنے میں کامیاب

روضہ مبارک حضرت عباس (علیہ السلام) کے زیرِ اہتمام منعقدہ تیسرے سالانہ العمید ایوارڈ برائے تلاوتِ قرآن کے 23ویں راؤنڈ میں عراق کے قاری عمار سالم فائنل مرحلے میں پہنچنے میں کامیاب ہو گئے ہیں۔

تلاوتِ قرآن کے اس عالمی مقابلے کا انعقاد روضہ مبارک کے قرآن علمی کمپلیکس کی جانب سے کیا گیا ہے، جس میں 20عرب اور اسلامی ممالک سے تعلق رکھنے والے نامور اور منتخب قراء کرام شرکت کر رہے ہیں۔

مقابلے کی شفافیت اور معیار کو برقرار رکھنے کے لیے ایک اعلیٰ سطح کا بین الاقوامی ججنگ پینل تشکیل دیا گیا ہے، جس میں مصر سے شیخ محمد بسیونی اور شیخ محمد عصفور، عراق سے شیخ ڈاکٹر باسم العابدی، ڈاکٹر مشتاق العلی اور قاری سید حسنین الحلو اور ایران سے قاری سید کریم موسوی شامل ہیں۔

مقابلے کے سیمی فائنل مرحلے کے اس راؤنڈ میں 'بڑوں کے زمرے' میں عراق سے قاری عمار سالم، انڈونیشیا سے قاری محمد رضا مولانا اور افغانستان سے قاری جواد حسنی کے درمیان سخت مقابلہ ہوا، اور بین الاقوامی جیوری کے حتمی فیصلے کے مطابق عراق سے تعلق رکھنے والے قاری عمار سالم اپنی بہترین کارکردگی کی بدولت اس راؤنڈ کے فاتح قرار پائے۔

اس راؤنڈ میں ننھے قراء بھائی بہن، محمد جواد کریم الموسوی اور فاطمہ کریم الموسوی کو بطور خاص مدعو کیا گیا تھا، جنہوں نے اپنی پُرکشش آواز میں تلاوتِ کلامِ پاک کے ساتھ ساتھ خوبصورت قصیدے بھی پڑھے۔ ججز پینل نے ان کی کارکردگی کو سراہتے ہوئے انہیں تلاوت اور نعت خوانی کی مہارتوں کو مزید نکھارنے کے لیے مفید مشورے اور ہدایات بھی دیں۔

واضح رہے کہ یہ مقابلہ روضہ مبارک حضرت عباس (علیہ السلام) کی ان کاوشوں کا حصہ ہے جن کا مقصد معاشرے میں قرآنی ثقافت کو عام کرنا ہے، کیونکہ قرآن ہی فرد اور معاشرے کی اصلاح کا اصل راستہ ہے۔

مکمل راؤنڈ دیکھنے کے لیے، یہاں کلک کریں۔

https://youtu.be/fjSXCmIdL8I?si=SVrorbCHBLXo5yOU