تیسرے سالانہ العمید ایوارڈ برائے تلاوتِ قرآن کے فاتحین کا اعلان

روضہ مبارک حضرت عباس (علیہ السلام) کے زیرِ اہتمام منعقدہ تیسرا سالانہ العمید ایوارڈ برائے تلاوتِ قرآن کی اختتامی تقریب میں "بڑوں" اور "نوجوانوں"کے زمرے میں پوزیشن حاصل کرنے والے خوش نصیب قراء کرام کے ناموں کا اعلان کیا گیا۔

تلاوتِ قرآن کے اس عالمی مقابلے کا انعقاد روضہ مبارک کے قرآن علمی کمپلیکس کی جانب سے کیا گیا ہے، جس میں 20عرب اور اسلامی ممالک سے تعلق رکھنے والے نامور اور منتخب قراء کرام نے شرکت کی۔

مقابلے کی شفافیت اور معیار کو برقرار رکھنے کے لیے ایک اعلیٰ سطح کا بین الاقوامی ججنگ پینل تشکیل دیا گیا تھا، جس میں مصر سے شیخ محمد بسیونی اور شیخ محمد عصفور، عراق سے شیخ ڈاکٹر باسم العابدی، ڈاکٹر مشتاق العلی اور قاری سید حسنین الحلو اور ایران سے قاری سید کریم موسوی شامل تھے۔

اختتامی تقریب میں روضہ مبارک حضرت عباس (علیہ السلام) کے سیکرٹری جنرل سید مصطفٰی مرتضیٰ آل ضیاء الدین، ڈپٹی سیکرٹری جنرل سید عباس موسیٰ احمد، بورڈ آف ڈائریکٹرز کے اراکین اور دیگر اعلیٰ عہدیداران نے شرکت کی۔

بڑوں کے زمرے میں ایران سے تعلق رکھنے والے قاری محسن قاسمی نے پہلی، عراق کے قاری عمار سالم الحلی نے دوسری اور کوموروس جزائر کے قاری عبدالرحمن احمد ممادی نے تیسری پوزیشن حاصل کی۔

نوجوانوں کی کیٹیگری میں پہلی پوزیشن انڈونیشیا سے تعلق رکھنے والے قاری محمد زیان فہریزی نے حاصل کی جبکہ دوسری پوزیشن افغانستان کے قاری مہدی ابراہیمی اور تیسری پوزیشن مصر کے قاری سید عزت سید راشد نے حاصل کی۔

سیکرٹری جنرل نے پوزیشن حاصل کرنے والے قراء کو سونے، چاندی اور کانسی کی اعزازی شیلڈز سے نوازا۔ تقریب کے اختتام پر فاتح قراء اور جیوری کے اراکین نے تلاوتِ کلامِ پاک کا شرف حاصل کیا۔

واضح رہے کہ یہ مقابلہ روضہ مبارک حضرت عباس (علیہ السلام) کی ان کاوشوں کا حصہ ہے جن کا مقصد معاشرے میں قرآنی ثقافت کو عام کرنا ہے، کیونکہ قرآن ہی فرد اور معاشرے کی اصلاح کا اصل راستہ ہے۔