شعبہ تعلقات عامہ اور کربلا یونیورسٹی کے درمیان ہاسٹلز میں مقیم طالبات کے لیے (الطمأنينة) پراجیکٹ کے آغاز پر تبادلہ خیال

روضہ مبارک حضرت عباس (علیہ السلام) کے شعبہ تعلقات عامہ نے کربلا یونیورسٹی کے ساتھ ہاسٹلز میں مقیم طالبات کے لیے (الطمأنينة) پراجیکٹ کے آغاز پر تبادلہ خیال کیا۔

یہ بات چیت شعبہ کے ایک وفد کے کربلا یونیورسٹی کے دورے کے دوران ہوئی، وفد میں العفاف وویمن کمپلیکس کے ارکان بھی شامل تھے، جو کہ اس منصوبے کی نگرانی کرتا ہے۔

شعبہ تعلقات عامہ کے یونیورسٹی اور اسکول ریلیشنز ڈویژن کے سربراہ سید محمود طاہر نے بتایا کہ وفد کے دورے کا مقصد اس پراجیکٹ کے عملی نفاذ کے لیے میکانزم وضع کرنا تھا۔ شعبہ تعلقات عامہ نے اس ضمن میں العفاف وویمن کمپلیکس اور یونیورسٹی کے متعلقہ انتظامی شعبہ جات کے مابین مشترکہ تعاون اور ہم آہنگی پیدا کرنے میں کلیدی کردار ادا کیا ہے۔

انہوں نے مزید کہا کہ یونیورسٹی کی انتظامیہ اور اساتذہ نے اس اقدام کا خیر مقدم کیا ہے، کیونکہ یہ منصوبہ ہاسٹلز کی طالبات کی مخصوص ضروریات پوری کرنے پر توجہ مرکوز کرتا ہے اور ایسے انسانی اہداف کا حامل ہے جو مختلف سطحوں پر طالبات کی معاونت میں مددگار ثابت ہوں گے۔

یونیورسٹی میں شعبہ ہاسٹل امور کے ڈائریکٹر ڈاکٹر مسلم الغانمی نے واضح کیا کہ یونیورسٹی اس منصوبے کی بھرپور حمایت اور اس کے انعقاد کے لیے مکمل تعاون کا یقین دلاتی ہے، کیونکہ ہاسٹلز کی طالبات کی فلاح کے حوالے سے اس کی اہمیت مسلمہ ہے اور اس سے مطلوبہ مقاصد کا حصول ممکن ہو سکے گا۔