عشرہ محرم اور عاشوراء کے حوالے سے امن و امان اور دیگر خدماتی امور کے لیے طے شدہ لائحہ عمل مکمل طور پر کامیاب رہا (روضہ مبارک حضرت عباس{ع})

عاشوراء کے دن عزاداری کے جلوسوں اور عزاء طویریج (ركضة طويريج) کے جلوس کے اختتام کے بعد روضہ مبارک حضرت عباس(ع) کے ڈپٹی سیکرٹری بشیر محمد جاسم ربیعی نے الکفیل نیٹ ورک کے نمائندے سے گفتگو کرتے ہوئے کہا ہے کہ حضرت عباس(ع) کے روضہ مبارک نے عشرہ محرم اور عاشوراء کے حوالے سے امن و امان اور دیگر خدماتی امور کے لیے جو طریقہ کار اور لائحہ عمل تیار کیا تھا وہ مکمل طور پر کامیاب رہا ہے اور کسی بھی حوالے سے کوئی ناخوشگوار واقعہ پیش نہیں آیا اور نہ ہی کسی بھی حوالے سے کسی خلل اور مشکل کا سامنا ہوا ہے۔
ربیعی کا کہنا تھا کہ ملکی سطح پر امن و امان کی صورت حال، دہشت گردوں کی دھمکیوں، سیکورٹی اداروں کی جںگ میں مصروفیت اور بہت سے دیگر سیاسی و غیر سیاسی امور کی وجہ سے یہ سال گزشتہ سالوں کی نسبت بہت مختلف ہے لیکن اس کے باوجود بھی سیکورٹی اور تمام انتظامات کے حوالے سے بھرپور کامیابی حضرت امام حسین(ع) اور حضرت عباس(ع) کے حرموں کے خدام، رضاکاروں اور کربلا کی حکومت کی مشترکہ کاوشوں اور پر خلوص جدوجہد کا نتیجہ ہے اور اس سلسلہ میں تعاون کرنے والے تمام احباب کا ہم دل کی گہرائیوں سے شکریہ ادا کرتے ہیں۔

یہ بات واضح رہے عاشوراء کے المناک واقعہ کا پرسہ پیش کرنے اور عزاداری کے لیے کئی ملین زائرین کربلا آئے ہیں اور اس سال عاشوراء کے حوالے سے عزاداری کے قیام اور زائرین کے لیے کھانے پینے اور دیگر انتظامات و مطلوبہ سہولیات فراہم کرنے کے عمل میں ہزاروں حسینی انجمنوں اور مختلف تنظیموں نے حصہ لیا اور سینکڑوں میڈیا ہاؤسس نے کربلا میں عاشوراء کے دن ہونے والی عزاداری کو براہ راست نشر کیا۔