بچوں کی کتابوں کی تیسری سالانہ نمائش میں روضہ مبارک حضرت عباس(ع) کی شرکت.....

تیسرے سالانہ کربلا انٹر نیشنل چلڈرنز بک فیئر مابین الحرمین میں جاری ہےاور اس میں جہاں دیگر کتابی اداروں نے بچوں کی کتابوں کو نمائش کے لیے رکھا ہے وہاں روضہ مبارک حضرت عباس علیہ السلام نے بھی اپنی بچوں کی منشورات اپنے سٹال میں سجا رکھی ہیں کہ جنہیں بچوں کے ساتھ ساتھ بڑے بھی کافی پسند کر رہے ہیں ۔

روضہ مبارک میں بچوں کے شعبہ کے انچارج سرمد سالم نے بتایا ہے کہ اس نمائش میں بچوں کی دسیوں دینی و ثقافتی کہانیوں ،چھوٹی چھوٹی کتابوں، تصویری البمز اور بچوں کے رسالوں کو رکھا گیا ہے اور نمائش کے ابتداء سے ہی روضہ مبارک حضرت عباس علیہ السلام کا سٹال بچوں اور بڑوں کی منزل مقصود بن گیا ہے خاص طور پر علمی و سائنسی امور کو سکھانے کے لیے بنائے گئے کھلونے بچوں کی نظروں کا مرکز بنے ہوئے ہیں۔

واضح رہے کہ اس نمائش میں عراق کے کتابی اداروں کے علاوہ لبنان ،کویت اور ایران کے دسیوں ناشرین اور کتابی اداروں نے شرکت کی ہے اور اس نمائش میں ایک ہزار سے زیادہ عناوین پر بچوں کی ثقافتی ،دینی اور تفریحی کتابیں موجود ہیں۔ اور یہ نمائش 17 فروری 2018 تک جاری رہے گی۔