امام زمانہ(عج) کی 1184ویں سالگرہ کی مناسبت سے کربلا میں مقام امام مہدی(ع) کے پاس جشن چراغاں

بروز سوموار 13شعبان المعظم 1439ھ بمطابق 1مئی 2018ء کو رات کے وقت حضرت امام حسین علیہ السلام اور حضرت عباس علیہ السلام کے روضہ مبارک کی طرف سے حضرت امام زمانہ عجل اللہ فرجہ الشریف کی1184 ویں سالگرہ کی مناسبت سے کربلا میں مقام امام زمانہ علیہ السلام کے پاس اٹھارواں سالانہ جشن چراغاں منعقد ہوا کہ جس میں مومنین کی بہت بڑی تعداد نے شرکت کی۔

اس جشن میں امام زمانہ عجل اللہ فرجہ الشریف کی حیات مبارک کے سالوں برابر یعنی1184 شمعیں روشن کی گئیں اور ان شمعوں کی مدد سے یہ عبارت لکھی گئی: (المهديّ ناصرُ المؤمنين).
جشن چراغاں کا آغاز قاری الحاج مصطفى صرّاف نے تلاوت قرآن مجید سے کیا جس کے بعد عراق کا قومی ترانہ پڑھا گیا اور شہداء کے لیے فاتحہ خوانی کی گئی۔

دونوں مقدس روضوں کی نمائندگی کرتے ہوئے شیخ میثم زیدی نے جشن سے خطاب کیا اور مومنین کو امام زمانہ عجل اللہ فرجہ الشریف کی سالگرہ کی پُر مسرت مناسبت پہ مبارک باد پیش کی۔ اور غیبت کے اس زمانہ میں مومنین پہ فرض ان امور کے بارے میں گفتگو کی کہ جن کا تعلق امام زمانہ عجل اللہ فرجہ الشریف کے انتظار اور ظہور کے حوالے سے ہے۔
اس محفل میں متعدد شعراء کرام نے امام زمانہ علیہ السلام کے حضور اپنا منظوم نذرانہ عقیدت پیش کیا کہ جن میں سر فہرست طالب فراتی، فلاح بارودی، محمد فاطمی، حسام حمزاوی، سيد أحمد موسوی اور عراق کے مختلف شہروں سے تعلق رکھنے والے دیگر شعراء نے امام زمانہ(ع) اور اہل بیت علیھم السلام کی شان میں قصائد پڑھ کر حاضرین سے داد تحسین حاصل کی.

اس کے بعد امام زمانہ(عج) 1184 ویں سالگرہ کی مناسبت سے 1184شمعیں روشن کی گئیں۔
واضح رہے کہ 9/4/2003ء کو عراقی شہر صویرہ سے تعلق رکھنے والے الحاج مقداد کریم ھادی نے اس جشن چراغاں کا آغاز کیا اور پہلی مرتبہ مقام امام زمانہ(ع) کے پاس امام زمانہ(ع) کے زندگی کے سالوں کے برابر شمعیں روشن کر کے ایک منفرد جشن کی بنیاد رکھی کہ جو ہر سال دونوں مقدس روضوں کی طرف سے منایا جاتا ہے۔